“Loba la mo̱ń a me̱nde̱ busise̱ janea diwo̱ lena di si me̱nde̱ buleye̱ to̱m.”​—Daniel 2:44, New World Translation (Betukwedi ba Was’a Peńa).

“Muna mome a bolabe̱ biso̱; Janea di me̱nde̱ be̱ o makata mao.”​—Yesaya 9:6.

• Minam Janea di te̱m na sim di mawaneano̱ wa.​—Yesaya 48:17, 18.

• Bwane̱ la longe̱ muńe̱nge̱, o ja la bwam la ke̱nge̱nge̱ na bonam o was’a peńa ni maye̱.​—Bebīsedi 21:3, 4.

E, ońola yin njo̱m iba:

• Yesu a lee̱ nje Janea la Loba di me̱nde̱no̱ londise̱.  Yesu okwe̱le̱ bokwedi bao o kane̱ ná Janea la Loba diye na ná jemea la Loba di bolabe̱ o wase. (Mateo 6:9, 10) Yesu a lee̱le̱ ne̱ni mu muka mu me̱nde̱no̱ sengabe̱.

  Ponda Yesu a tano̱ o wase, a dese̱ ba njai, a bo̱lise̱ baboedi, a pumbwe̱le̱ pe̱ bawedi! (Mateo 15:29-38; Yohane 11:38-44) Yesu, ka Mudied’a Janea la Loba di maye̱, a boli ebongolo ya bwam ya nje di janea di me̱nde̱no̱ bolea bato be o was’ao.​—Bebīsedi 11:15.

• Bete̱medi ba mundi ma wase be mabamse̱ ná Janea la Loba le be̱be̱. Yesu a se̱le̱ bīse̱ ná obiana Janea di mawana musango o wase, mundi masu mu me̱nde̱ londa na take ńena bila, njai na soa la mińangadu ba mawanano̱.​—Mateo 24:3, 7.

  Be bete̱medi be me̱ne̱ne̱ we̱nge̱. Jeso̱ ná di be̱ mbaki ná Janea la Loba di mawana su la yinka ndutu ye̱se̱ sona ponda.